Уште една потврда на светското ниво за квалитетот и вредноста на Универзитетот за туризам и менаџмент во Скопје
Приемот на Универзитетот за Туризам и Менаџмент во Скопје, во Светската Туристичка Организација на Обединетите Нации (UNWTO), официјално беше потврден на 89-тата сесија на Извршниот комитет на оваа организација, одржана од 24-ти до 26-ти Октомври 2010-та, на островот Киш во Иран. Со тоа, УТМС стана еден од елитните Универзитети, во Европа, па и во Светот, кои се членки на оваа најпрестижна организација од областа на туризмот. Дека станува збор за елитно светско друштво во оваа област, говорат следниве податоци:

Светската Туристичка Организација е специјализирана агенција на Обединетите Нации и водечка меѓународна организација со централна улога во областа на туризмот, чии главни заложби се промовирање на развојот на одговорен, одржлив и универзално достапен туризам, како предуслов за социо-економски напредок на една земја.
Во оваа најпрестижна организација членуваат 154 земји и над 400 придружни членки, кои го претставуваат приватниот сектор, образовните институции, туристичките здруженија и сл.
Со оглед на бизнис обемот на туризмот, кој е еднаков или дури ги надминува оние на извозот со нафта, прехрамбени производи или автомобили, приоритет на Светската Туристичка Организација е поттикнување на земјите во светот за издигнување на туризмот на врвот на националните агенди.
Препораката на оваа организација е промовирање на позитивните економски, социјални и културни ефекти на туризмот и целосно искористување на тие предности во глобалниот свет.
Според податоците на UNWTO туризмот е една од најважните стопански гранки бидејки бележи континуиран раст во последните 50 години, како во бројот на туристи, така и во бројот на дестинации и приходи од туризмот. Во 2009-та година е остварен приход од 611 милијарди евра од туризмот, а патувале 880 милиони луѓе. Во 2020-та година се предвидува дека бројот на туристи годишно ќе изнесува 1,5 милјарди луѓе.

Подетално, со Светската Туристичка Организација на Обединетите Нации можете да се запознаете на веб страницата: www.unwto.org